تعبت الله يكون بعـون هالقلب وبعونـي
تعبت من الوجيه اللي تجي وتروح بسهوله
وانا صعبه اصدق كيف خلوني وباعونـي
اقول احيان معقوله ؟ وهي ماهيب معقوله؟
لأني ماقدرت الا معاهم احسـن ظنونـي
اقول الجرح والزله من الغالين مقبولـه
ادور عذرهم واسكت وامشيها على هوني
واقول اخطائهم تغفر وهي بالعمد مفعولـه
يلوموني على طيبـة خفوقـي يلومونـي
مدام ان النوايا بيـض والامـال مأمولـه
صبرت اكثر من اللازم وقلت الا يريدوني
وهم فعلا يريدوني ولكن النفـس مقتولـه
بعد ماقصروا حتى قبل فرقاهـم اعطوني
كم جرح على كم كلمه كم طعنه وكم قوله
نعم مال علي حظي وبعد استاهل جنونـي
لأني طحت في بعض القلوب الغير مسؤوله
تعودت انصدم بالذات ممن هـم يحبونـي
وأنا ماعندي استعداد اجرب واخسر الجوله
على كثر الوجيه اللي تمر الحين بعيونـي
احس الناس بالنسبه لي نـاس مجهولـه
بأعيش بدونهم عادي مثل ماعاشوا بدوني
وذي كلمه على لساني وهي بالقلب مقيوله
مادام الهوى طعنه وشفت طعونك طعونـي
تطمن حيل يا قلبي انـا ماعادنـي حولـه
ومادام كثير حبوني وجت فتره وخلونـي
اجل بطلت وشهوله احب ؟ بالله وشهولـه
